თბილისის მერიისა და კომპანია „ას ჯორჯიას“ შეთანხმებით, ისნის რაიონში, საცხოვრებელი კომპლექსის „პარკ ბულვარის“ მიმდებარედ, 7,5 ჰექტარ ფართობზე პარკი გაშენდა.
ახალი პარკი დღეს კახა კალაძემ დაათვალიერა და პარკში შეკრებილ მოსახლეობას სცენიდან მიმართა.
„ძალიან მიხარია, რომ ამდენი ახალგაზრდაა შეკრებილი და არა მხოლოდ ახალგაზრდა. თქვენთან ერთად მეც გახარებული ვარ, რომ ისნის რაიონში, „დირსის“ დასახლებაში ასეთი შესანიშნავი რეკრეაციული სივრცე შეიქმნა. ეს არის ძალიან კარგი მაგალითი იმისა, თუ როგორ შეიძლება ბიზნესმა და მუნიციპალიტეტმა ითანამშრომლოს. მინდა, მადლობა გადავუხადო კომპანია „ას ჯორჯიას“ თანამშრომლობისთვის და ამ ძალიან კარგი პროექტის განხორციელებისთვის. მართლაც მშვენიერია, საფეხბურთო, საკალათბურთო მოედნები, ატრაქციონები პატარებისთვის, ველობილიკები, გამწვანებული, განათებული სივრცე. ახლა მთავარია, რომ ამ ყველაფერს მოვუაროთ და შევინარჩუნოთ. ჩვენ ვაგრძელებთ ასეთი პროექტების განხორციელებას. ყველაზე მნიშვენელოვანია, რომ ქვეყანაში გვქონდეს მშვიდობა. რომ არ იყოს მშვიდობა, შეუძლებელი იქნებოდა დღეს აქ შეკრება, შეუძლებელი იქნებოდა, დღეს აქ პარკი გაგვეხსნა. შესაბამისად, ყველაზე მთავარი და მნიშვნელოვანია სიმშვიდე, რასაც ცხადია, მოყვება ქვეყნის ეკონომიკური განვითარება, გაძლიერება და კეთილდღეობა“, - განაცხადა კახა კალაძემ.
ადგილზე ასევე იმყოფებოდნენ თბილისის საკრებულოს და დედაქალაქის მერიის წარმომადგენლები.
პარკის გამწვანების მიზნით დაირგო 10 000-ზე მეტი ნერგი, მოწყობილია ველო და საფეხმავლო ბილიკები, სპორტული და საბავშვო მოედნები, ძაღლების სასეირნო ზონა და პარკისთვის საჭირო სხვა ინფრასტრუქტურა. ბულვარის სიგრძე დაახლოებით 1750 მეტრს შეადგენს.
პროექტის განხორციელებისთვის კომპანიამ 3 მლნ აშშ დოლარზე მეტი დახარჯა. ამასთან თვითონ უზრუნველყოფს პარკის მოვლა-პატრონობას.
"ჩემთვის თანამდებობები არასდროს ყოფილა პრიორიტეტული, არც მაშინ, როდესაც..."