14 მაისი, 2018

ევროპის დღეების ფარგლებში გამართული კონფერენცია

თბილისის მერი კახა კალაძე ევროპის დღეების ფარგლებში გამართულ კონფერენციას დაესწრო და ღონისძიების სხვა მონაწილეებთან ერთად ევროპულ არჩევანზე ისაუბრა.

დედაქალაქის მერმა ყურადღება გაამახვილა მუნიციპალიტეტების როლზე საქართველოს ევროპასთან ინტეგრაციის პროცესში.

„ჩვენ უნდა გვქონდეს უფრო მჭიდრო კომუნიკაცია საზოგადოებასთან, რათა უფრო მეტი ინფორმაცია მივაწოდოთ, თუ რამდენად მნიშვნელოვანი ის მიმართულება, საითკენაც ჩვენ მივდივართ. ჩვენ ვართ ევროპა, ჩვენი ხალხი არის ევროპული მსოფლმხედველობის. ჩვენ მნიშვნელოვანი რეფორმები განვახორციელეთ ბოლო წლების განმავლობაში და რა თქმა უნდა, გვაქვს ძალიან დიდი შედეგი. თუნდაც ის, რომ დღეს თითოეულ ჩვენგანს აქვს შესაძლებლობა, ქართული პასპორტით იმოგზაუროს ევროპულ ქვეყნებში ყოველგვარი პრობლემების გარეშე, თუმცა, მხოლოდ ეს არ უნდა იყოს ის, საითაც მივდივართ. ყველაფერი უნდა გავაკეთოთ იმისათვის, რომ ჩვენი ქვეყანა ძალიან მალე გახდეს დიდი ევროპული ოჯახის წევრი. ჩვენ გვაქვს საამაყო მრავალფეროვანი კულტურა, ტრადიციები, ჩვენი ისტორია, რითაც თითოეულმა ჩვენგანმა უნდა იამაყოს და სწორედ ამიტომ არის ჩვენი ქვეყანა საინტერესო მთელი მსოფლიოსთვის. ჩვენ მზად ვართ თანამშრომლობისთვის. ვფიქრობ, რომ ამ მხრივ მუნიციპალიტეტების როლი ძალიან მნიშვნელოვანია, თუნდაც რეფორმების თვალსაზრისით. ძალიან ბევრი გვაქვს სამუშაო და იცით, რომ ამ მიმართულებით დაწყებულია მუშაობა და დეცენტრალიზაცია არის ერთ-ერთი უმნიშვნელოვანესი კომპონენტი, რომელზეც ვმუშაობთ. ჩვენ ყველაფერს გავაკეთებთ იმისთვის, რომ მოსახლეობას მივაწოდოთ მეტი ინფორმაცია და ავუხსნათ, თუ რამდენად მნიშვნელოვანია ის მიმართულება, რომელიც ჩვენმა ქვეყანამ აირჩია“, - განაცხადა კახა კალაძემ.

კონფერენცია სახელწოდებით „ევროპა - საქართველოს ისტორიული არჩევანი“ საქართველოს საგარეო საქმეთა სამინისტროსა და ნატოსა და ევროკავშირის შესახებ საინფორმაციო ცენტრის ორგანიზებით, ასევე, თბილისის მუნიციპალიტეტის საკრებულოს მხარდაჭერით განხორციელდა. ღონისძიებას, საგარეო საქმეთა მინისტრთან, თბილისის მერთან და საკრებულოს თავმჯდომარესთან ერთად, საქართველოს სხვადასხვა მუნიციპალიტეტის მერები და მათი მოადგილეები ესწრებოდნენ.

მსგავსი სიახლეები